Isang residente ng La Carlota City na si Deric Fernandez ang nagbahagi ng kaniyang karanasan sa pag-aalaga ng isang dagang-bukid na pinangalanan niyang Bobet. Natagpuan ni Fernandez ang daga sa isang sapa noong ito ay maliit pa at nagpasya siyang kupkupin ito. Sa paglipas ng panahon, naging malapit ang loob ng hayop sa kaniya at nagsilbing stress reliever. Upang masanay sa pakikisalamuha, nagdagdag pa siya ng ibang daga sa kaniyang pangangalaga. Ayon sa isang eksperto sa beterinaryo, posible ang pagkakaroon ng ugnayan sa pagitan ng tao at mailap na hayop kung ituturing ng hayop ang tao bilang bahagi ng kaniyang grupo. Gayunpaman, napansin sa isang panayam na tila nagbago ang ugali ni Bobet at naging agresibo, kaya plano ni Fernandez na sumailalim ang daga sa pagsasanay upang muling mapaamo.
Source : GMA News
Photo : GMA News
