Спортын хувцас үйлдвэрлэгч Adidas компани Олимпын дүрвэгсдийн сантай урт хугацааны хамтын ажиллагааны гэрээ байгуулснаа зарлалаа. Энэхүү түншлэлийн хүрээнд Adidas нь Дүрвэгсдийн олимпын багийн тамирчдыг тэмцээн болон бэлтгэлийн үед шаардлагатай хувцас, хэрэглэлээр бүрэн хангах юм. Түүнчлэн уг дэмжлэг нь зөвхөн олимпын багийн гишүүдээр хязгаарлагдахгүй, дүрвэгч тамирчдыг дэмжих хөтөлбөрт хамрагдсан бусад тамирчдад ч хүрэх ажээ. Талууд энэхүү санаачилгаараа дамжуулан мөргөлдөөн, дайны улмаас эх орноосоо дүрвэсэн тамирчдад урам зориг өгөх, тэднийг спортоор дамжуулан дэмжих зорилготой байгаагаа илэрхийлсэн байна. Рио-2016 олимпоос эхлэн дүрвэгч тамирчид олимпын наадамд оролцох боломжтой болсон бөгөөд Парис 2024 наадамд нийт 37 тамирчин тус багийн бүрэлдэхүүнд багтан өрсөлдсөн түүхтэй.
Source : Sonin.mn
